کراچی: سابق کپتان شاہد آفریدی اپنے داماد شاہین شاہ آفریدی کی حمایت میں پھٹ پڑے۔
ایکسپریس نیوز کے مطابق سابق ٹیسٹ کپتان شاہد آفریدی اپنے داماد شاہین آفریدی کی حمایت میں پھٹ پڑے، انہوں نے کہا کہ ذمہ داری دی ہے تو وقت بھی دیا جائے، پی سی بی میں ہرآنے والا سمجھتا ہے کہ اس سے پہلے آنے والے نے غلط کام کیے۔
شاہد آفریدی نے کراچی میں بلوچ مجاہد فٹبال کلب، ابراہیم حیدری، ملیر میں بلوچ مجاہد رمضان المبارک فٹبال ٹورنامنٹ کی افتتاحی تقریب کے موقع پر میڈیا سے گفتگو کرتے ہوئے کہا کہ قومی سلیکشن کمیٹی کو خود مختار بنانا درست لیکن اس کا سربراہ بھی ہونا چاہیے، کسی غیر ملکی کو قومی ٹیم کا ہیڈ کوچ بنانے میں کوئی مضائقہ نہیں تاہم کوچنگ اسٹاف مقامی افراد پر مشتمل ہونا چاہیے، محمد عامر اور عماد وسیم کا ریٹائرمنٹ واپس لینے کا فیصلہ درست ہے، میرے ریٹائرمنٹ کا فیصلہ لینے کا وقت گزر چکا۔
تقریب میں وفاقی وزیر برائے صحت عبدلقادر پٹیل، ایم این اے سید آغا رفیع اللّٰہ اور ایم پی اے محمود عالم جاموٹ و دیگر بھی موجود تھے۔
یہ بھی پڑھیں: عماد وسیم کے بعد محمد عامر نے بھی ریٹائرمنٹ واپس لے لی
شاہد آفریدی نے کہا کہ جس کو ذمہ داری دی ہے تو اس کو وقت بھی دیں،تبدیلی کی باتیں سامنے آنے سے لگتا ہے کہ کپتان بنانے کا جوفیصلہ پہلے کیا گیا تھا یا تو وہ غلط تھا یا اب جو ہوگا وہ غلط ہوگا، فاسٹ بولر محمد عامر اور آل راؤنڈر عماد وسیم کا ریٹائرمنٹ واپس لینے کا فیصلہ درست ہے، اگر کوئی کھلاڑی سمجھتا ہے کہ وہ پاکستان کے لیے خدمات سر انجام دے سکتا ہے تو اسے کرکٹ کھیلنی چاہیے، تاہم دونوں مزکورہ کھلاڑیوں کواپنی فٹنس دیکھانی پڑے گی اور ڈومیسٹک کرکٹ کا حصہ بننا پڑے گا۔
انہوں نے کہا کہ عماد وسیم اور محمد عامر سینئر اورتجربہ کار کھلاڑی ہیں،ان کی موجودگی پاکستان کرکٹ ٹیم کو تقویت دے گی جبکہ نوجوان کرکٹرز کو ان سے سیکھنے کو ملے گا اور اس کا فائدہ پاکستان کرکٹ ٹیم کو پہنچے گا۔
آنے والے مقابلوں کی تیاریوں کے سلسلے میں پاکستان کرکٹ ٹیم کے ممکنہ کھلاڑیوں کے لیے لگائے جانے والے فٹنس کیمپ سے متعلق سوال کے جواب میں انہوں نے کہا کہ کاکول میں میرا اچھا تجربہ رہا ہے، وہاں پر تربیت کے مواقع ملنے پر کھلاڑی کی فٹنس پر کافی فرق پڑتا ہے اور کھلاڑی کی جسمانی تربیت پر اچھے اثرات مرتب ہوتے ہیں، دورہ نیوزی لینڈ کے لیے قومی ٹیم میں منتخب نہ ہونے والے کھلاڑیوں کو کاکول میں مزید وقت گزارنا چاہیے تاکہ ان کی فٹنس میں مزید بہتری آئے اور ان کی کارکردگی زیادہ اچھی ہوجائے، کھلاڑیوں کو اگر کاکول میں ایک مہینے تک کیمپ میں تربیت حاصل ہوجائے تو وہ سپرمین بن کر نکلیں گے۔
یہ بھی پڑھیں: شاہین آفریدی کو عامر سے سیکھنے کا مشورہ ملنے لگا
پاکستان کرکٹ ٹیم کے لیے غیر ملکی کوچ متعین کرنے کے حوالے سے سوال کے جواب میں شاہد خان آفریدی نے کہا کہ اینڈی فلاور جیسے غیر ملکی کوچز پاکستان ٹیم کے لیے سود مند رہیں گے،میری ذاتی رائے یہ ہے کہ پاکستان کرکٹ ٹیم کے لیے ہیڈ کوچ غیر ملکی ہو تو کوئی مضائقہ نہیں، تاہم کوچنگ اسٹاف مقامی افراد پر مشتمل ہونا چاہیے۔
انٹرنیشنل کرکٹ کو خیرباد کہہ دینے والے کھلاڑیوں کی جانب سے فیصلے واپس لینے پر ازراہ مزاح پوچھے جانے والے سوال کے جواب میں شاہد آفریدی نے کہا کہ اب میرے لیے ریٹائرمنٹ کا اعلان واپس لینا مشکل ہے، ریٹائرمنٹ واپس لینے کا وقت گزر گیا۔
سابق کپتان نے کہا کہ جب چہرے تبدیل ہوتے ہیں تو نظام بھی تبدیل ہوجاتا ہے، بندہ سمجھتا ہے کہ وہ جو کام کرے گا سب سے الگ ہوگا، پی سی بی میں نیا آنے والا سمجھتا ہے کہ پہلے والے نے غلط کام کیا۔
مزید پڑھیں: پی سی بی کی 7رکنی سلیکشن کمیٹی تشکیل، وہاب ریاض، محمد یوسف شامل
قومی سلیکشن کمیٹی کے حوالے سے پوچھے جانے والے سوال کے جواب میں سابق ٹیسٹ کپتان نے کہا کہ چیئرمین پی سی بی کا سلیکشن کمیٹی کوبا اختیار خوش آئند اور مسرت کن ہے، لیکن میرا خیال ہے کہ سلیکشن کمیٹی کا سربراہ ضرور ہونا چاہیے تھا،سربراہ نہ ہونے سے قومی ٹیم کے انتخاب سے متعلق فیصلہ کرنے میں مشکل ہوگی،میری رائے ہے کہ پہلے بھی یہ ذمہ داری ادا کرنے والے سابق ٹیسٹ کرکٹروہاب ریاض اس ذمہ داری کے لیے زیادہ مناسب ہیں اور ان کو ہی سلیکشن کمیٹی کا سربراہ ہونا چاہیے۔
سوشل میڈیا پر خود پر کی جانے والی تنقید سے متعلق سوال کے جواب میں شاہد خان آفریدی نے کہا کہ مجھے اس ملک نے بہت محبت دی ہے جس کا جواب بھی میں محبت سے دیناچاہتاہوں،آپس میں نفرت پھیلانا اچھی بات نہیں
The post شاہد آفریدی اپنے داماد شاہین شاہ آفریدی کی حمایت میں پھٹ پڑے appeared first on ایکسپریس اردو.
کوئی تبصرے نہیں:
ایک تبصرہ شائع کریں