خطے میں کشیدگی کے خاتمے کیلیے پاکستان کا کردار قابل تعریف ہے؛ سعودی عرب

سعودی وزیر خارجہ شہزادہ فیصل بن فرحان نے کہا ہے کہ سعودی عرب خطے میں کشیدگی کم کرنے کے لیے پاکستان اور قطر کی سفارتی کوششوں کی حمایت کرتا ہے اور تنازعات کے حل کے لیے بات چیت اور سفارت کاری کو اہم سمجھتا ہے۔ نیویارک میں اقوام متحدہ کی جنرل اسمبلی کے اجلاس سے خطاب کرتے ہوئے سعودی وزیر خارجہ نے خطے میں امن و استحکام کے لیے ریاستوں کی خودمختاری کا احترام اور تنازعات کا پرامن حل تلاش کرنے پر زور دیا۔ فیصل بن فرحان نے کہا کہ خلیجی خطے کا استحکام صرف علاقائی امن تک محدود نہیں بلکہ توانائی کی فراہمی، عالمی تجارت اور سپلائی چین کے تسلسل سے بھی براہ راست جڑا ہوا ہے۔ انہوں نے بین الاقوامی آبی گزرگاہوں میں جہاز رانی کی آزادی اور سلامتی کو یقینی بنانے کی ضرورت پر زور دیا۔ سعودی وزیر خارجہ کی جانب سے پاکستان اور قطر کی کوششوں کی حمایت ایسے وقت میں سامنے آئی ہے جب دونوں ممالک علاقائی کشیدگی کم کرنے اور سفارتی رابطوں کو آگے بڑھانے میں سرگرم ہیں۔ قطر نے اس سے قبل پاکستان کی قیادت میں امریکا اور ایران کے درمیان جاری سفارتی کوششوں کی حمایت کا اظہار بھی کیا تھا۔ ادھر سعودی عرب، پاکستان اور ترکی کے وزرائے خارجہ نے نیویارک میں مکہ مشترکہ دفاعی معاہدے کے تحت بھی ملاقات کی، جس میں علاقائی صورتحال، کشیدگی میں کمی اور آزادانہ بحری آمدورفت پر تبادلہ خیال کیا گیا۔ تینوں ممالک نے بحرانوں کے پرامن حل اور خطے میں پائیدار امن کے لیے مشترکہ کوششیں جاری رکھنے کے عزم کا اظہار کیا۔ سعودی وزیر خارجہ نے فلسطینی عوام کو درپیش مشکلات کا بھی ذکر کیا اور فلسطینیوں کی جبری بے دخلی کی مخالفت کرتے ہوئے بین الاقوامی قوانین کی پاسداری پر زور دیا۔ انہوں نے یمن میں استحکام، شہریوں کے تحفظ اور علاقائی سلامتی کے لیے سفارتی کوششیں جاری رکھنے کی ضرورت بھی اجاگر کی۔